ມອບ-ຮັບ  ເຄື່ອງອຸປະໂພກ-ບໍລິໂພກ

ເນື່ອງໃນວັນສ້າງຕັ້ງກອງທັບປະຊາຊົນລາວ 20 ມັງກອນ 1949 ຄົບຮອບ 75ປີ ທີ່ຈະໝູນວຽນບັນຈົບຄົບຮອບອີກວາລະໜຶ່ງ ແລະ ເຫັນໄດ້ເຖິງຄວາມສຳຄັນຂອງວັນດັ່ງກ່າວ, ໃນໂອກາດນີ້ສະຫາຍ ມອນໄຊ ລາວມົວຊົ່ງ ກຳມະການສຳຮອງສູນກາງພັກ ເລຂາຄະນະບໍລິຫານງານ ສຊປລ, ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີປະຈຳຫ້ອງວ່າການນາຍົກລັດຖະມົນຕີພ້ອມຄະນະ ໄດ້ເດີນທາງລົງພົບປະຢ້ຽມຢາມອ້າຍນ້ອງທະຫານ ກອງຮ້ອຍຊາຍແດນ 321 ທີ່ບ້ານອາວຽນ ເຂດຈຸດສຸມລະໂກ ເມືອງເຊໂປນ ແຂວງສະຫວັນນະເຂດ.  
ການລົງພົບປະຢ້ຽມຍາມຄັ້ງນີ້ ສະຫາຍ ມອນໄຊ ລາວມົວຊົ່ງ  ໄດ້ຕີລາຄາສູງຕໍ່ການເຄື່ອນໄຫວປະຕິບັດໜ້າທີ່ວຽກງານຂອງອ້າຍນ້ອງທະຫານ ກອງຮ້ອຍຊາຍແດນ 321 ທີ່ຍາມໃດກໍປະກອບສ່ວນຢ່າງຕັ້ງໜ້າຮັບໃຊ້ປະຊາຊົນ,ໃກ້ຊິດຕິດແທນກັບປະຊາຊົນ ຄຽງຄູ່ກັບການປ່ຽນແປງທາງດ້ານເສດຖະກິດ ເຮົາຄວນຮັບມືກັບການປ່ຽນແປງຄືແນວໃດ ແລະ ຈະແກ້ໄຂບັນຫາທາງດ້ານເສດຖະກິດ ໃຫ້ຜູ້ທີ່ໜຸ່ມນ້ອຍປະຢັດມັດທະຍັດຄືແນວໃດເພື່ອເຮັດໃຫ້ການເປັນຢູ່ດີຂຶ້ນເທື່ອລະກ້າວ. ນອກນີ້, ສະຫາຍຍັງກ່າວຕື່ມອີກວ່າ: ພາຍໃນເດືອນມັງກອງນີ້ ເປັນເຫດການທີ່ສຳຄັນຂອງພັກຂອງຊາດ ໂດຍສະເພາະວັນສ້າງຕັ້ງກອງທັບປະຊາຊົນລາວ ຄົບຮອບ 75ປີ ທີ່ຈະມາເຖິງນີ້ຂໍອວຍພອນແດ່ນາຍ ແລະ ພົນທະຫານຕະຫຼອດຮອດທົ່ວກຳລັງປະກອບອາວຸດ ຈົ່ງມີສຸຂະພາບເຂັ້ມແຂງ, ມີຄວາມຜາສຸກໃນຊີວິດຄອບຄົວ, ຈົ່ງສືບຕໍ່ປະຕິບັດໜ້າທີ່ວຽກງານທີ່ພັກ ແລະ ລັດມອບໝາຍໃຫ້ຢ່າງມີຜົນສຳເລັດ ພ້ອມດຽວກັນນີ້ການລົງພົບປະຢ້ຽມຍາມຄັ້ງນີ້ ຍັງນຳເອົາເຄື່ອງອຸປະໂພກ-ບໍລິໂພກ, ອຸປະກອນກິລາ, ອຸປະກອນສຶກສາ ທີ່ໄດ້ຮັບການອຸປະຖໍາຈາກຫ້ອງວ່າການສຳນັກງານນາຍົກລັດຖະມົນຕີ ຊຶ່ງລວມມູນຄ່າທັງໝົດ75.000.000ກີບ ມາມອບໃນຄັ້ງນີ້ອີກດ້ວຍ.
ຂ່າວ-ພາບ: ສະຫວັນນະເຂດ